Mkuu wa Wilaya ya Babati Mhe. Emmanuella Kaganda amehitimisha rasmi Maonesho ya Biashara ya ‘Tanzanite Manyara Trade Fair 2024’ yaliyofanyika kwa muda wa siku kumi katika Uwanja wa Stendi ya zamani Mjini Babati kuanzia Octoba 20 – 30 2024.

Mhe. Kaganda amesema kuwa maonesho hayo yamevutia idadi kubwa ya washiriki kutoka 232 mwaka jana hadi 422 kwa mwaka huu ambapo ongezeko hilo limeakisi maendeleo ya biashara na uchumi katika Mkoa wa Manyara.

Aidha Mkuu huyo wa Wilaya ameipongeza Mamlaka ya Usimamizi wa Bima Tanzania (TIRA) kwa ushiriki wao na kusifu kazi nzuri inayofanywa na Mamlaka ya kutoa elimu ya bima hasa katika Maonesho hayo, alipotembela banda la TIRA na kupitishwa katika majukumu mbalimbali yanayofanywa na Mamlaka.

Mamlaka ilishiriki Maonesho hayo kwa kutoa elimu ya bima na kusikiliza maoni mbalimbali ya Wananchi na kujibu maswali yao. Maonesho hayo yaliandaliwa na TIRA kanda ya kati Dodoma ambayo inasimamia mikoa ya Manyara, Dodoma na Iringa.

#TIRA KWA SOKO SALAMA LA BIMA