Mamlaka ya Usimamizi wa Bima Tanzania (TIRA) leo, Septemba 23, 2026, imeshiriki katika Warsha ya Maadhimisho ya Siku ya Usafiri Majini Duniani (World Maritime Day 2026), iliyofanyika katika Ukumbi wa Royal Naivera Hotel, Tanga.

Warsha hiyo imefunguliwa na Kaimu RAS Mkoa wa Tanga Ndugu Emegius Kasunza na kuhudhuriwa na viongozi wa serikali Ngazi ya Mkoa na wilaya, wadau mbalimbali wa usafiri majini, wanafunzi wa vyuo vya Ubaharia, wanafunzi wa shule za sekondari Old Tanga na Tanga Tech.

Ushiriki wa TIRA ni sehemu ya jitihada za kuungana na taasisi mbalimbali zinazoshiriki katika maadhimisho na Maonesho ya Siku ya Usafiri Majini Duniani yanayofanyika jijini Tanga, katika Viwanja vya Kijiji 21, Wilaya ya Tanga Mjini.

Maadhimisho hayo yanafanyika chini ya kaulimbiu “Kutoka Sera hadi Utekelezaji: Kuimarisha Ubora katika Sekta ya Usafiri Majini,” inayolenga kuhamasisha utekelezaji wa sera na mikakati inayochangia kuimarisha usalama, ufanisi na maendeleo endelevu katika sekta ya usafiri majini.

Maonesho hayo yalizinduliwa rasmi tarehe 21 Septemba 2026 na Katibu Mkuu wa Wizara ya Ujenzi na Uchukuzi, Serikali ya Mapinduzi ya Zanzibar, Mhandisi Ali Said Bakari. Maonesho hayo yanatarajiwa kuhitimishwa kesho, Septemba 24, 2026, na Waziri wa Uchukuzi, Mhe. Prof. Makame Mbarawa.

Kupitia ushiriki wake, TIRA inaendelea kutoa elimu kuhusu umuhimu wa bima katika sekta ya usafiri majini, hususan katika kulinda mali, biashara na shughuli mbalimbali dhidi ya athari zinazoweza kujitokeza kutokana na hatari za usafiri majini. TIRA pia inatumia fursa hiyo kuendelea kushirikiana na wadau na taasisi mbalimbali katika kuimarisha uelewa na matumizi sahihi ya huduma za bima.

TIRA — Kwa Soko Salama la Bima.